Saturday, 30 April 2011

லசாரஸ் சிண்ட்ரோம்

ஒன்று விட்ட பாட்டியோ தாத்தாவோ இறந்து விட்டார்.
ஒப்பாரியெல்லாம் முடிந்து பாடை கட்டும் நேரத்தில் அவர் எழுந்து உட்கார்ந்து "ஒரு காபி  கொடுப்பா!" என்று கேட்டால் எப்படி இருக்கும்?

இப்படி மீண்டும் உயிர்த்தெழுவதை தான் 'லசாரஸ் சிண்ட்ரோம்' என்கிறார்கள்.


பெயர்க்காரணம்:

லசாரஸ் என்பவர் பைபிளின் படி, இறந்த நான்கு நாட்களுக்கு பின்  ஏசுவின் உதவியால் உயிர்த்தெழுந்தவர். அதனால் இது லசாரஸ் சிண்ட்ரோம்.

2009 ஆம் ஆண்டு வரை உலகில்  மொத்தம் 39 பேர் இது போல இறந்த பின் உயிர்த்தெழுந்திருப்பதாக தகவல்.

இப்படி எழுந்தவர்களில் சிலர்  செத்துப் பிழைத்ததன் அடையாளமே இன்றி நல்ல உடல்நலத்துடன் வாழ்ந்திருக்கிறார்கள்.

பொதுவாய், இறந்தவர்களை மருத்துவர்கள் இதய இயக்கமீட்பின் (CPR) மூலம் உயிர்பிக்க  முயற்சிக்கிறார்கள்.  அப்படியும் உயிர் பிரிந்தால் பத்து நிமிடம் வரை கண்காணிப்பில் வைத்திருந்து விட்டு, உறவினர்களுக்கு தெரிவிக்கிறார்கள்.

சென்ற ஏப்ரல் மாதம் பினாங்கில் 65வயது ஆடவர் ஒருவர், இறந்து விட்டதாய் அறிவிக்கப் பட்ட  இரண்டரை மணி நேரம் கழித்து இப்படி     சாவகாசமாய்  உயித்தெழுந்திருக்கிறார்.

லசாரஸ் சிண்ட்ரோமிற்கான  சரியான காரணத்தை மருத்துவர்களால் கண்டுபிடிக்க முடியவில்லை. இதய இயக்கமீட்பு முயற்சிக்குப்  பிறகு உருவாகும் வாயுக்களால் இதயம் மீண்டும் துடித்திருக்கலாம்   என்று கூறுகிறார்கள்.

மண்ணில் புதைக்கப் பட்ட பிறகு எத்தனைப் பேர் இப்படி எழ முயற்சித்தார்கள் என்பது கடவுளுக்கே வெளிச்சம்.

Tuesday, 26 April 2011

ஆவி உலகம் - 1

எனக்கு கொஞ்சம் நாட்களாக ஆவிகளைப் பற்றி அறியும் ஆவல் ஏற்பட்டிருக்கிறது. அதனால் அபசகுணமாய் இருந்தாலும், அவற்றிலிருந்தே ஆரம்பிக்கிறேன். இந்த விஷயங்கள் எல்லாம் நான் படித்து தெரிந்துக் கொண்டவையே. உண்மை என்பதற்கு என்னிடம் எந்த ஆதாரமும் இல்லை.

சரி முதலில்ஆவியுலகம் பற்றி ஒரு சிறிய முன்னுரை.

ஆவி என்பது நம் உடலிலிருக்கும் ஆத்மாவேயாகும் (சூட்சம உடல்). இது நம் உடலை விட்டு  பிரியும் போது இறந்ததாக கருதப்படுகிறோம்.

மொத்தத்தில் ஆவியுலகம் புண்ணிய லோகம், மத்திய லோகம், பாவ லோகம் என மூன்று பிரிவுகளாய் இயங்குகிறது.

நல்ல காரியங்களைச் செய்தவர்களின் ஆவி நேராக புண்ணியலோகம் செல்கிறது. பொதுவாய் இங்கே செல்பவர்களுக்கு மறுபிறவி இல்லை.

மத்திய லோகத்தில் இருக்கும் ஆவிகள் சில காலம் கழித்து புண்ணியலோகம் செல்லும் தகுதியைப் பெறுகின்றன.

தெரிந்தே பாவச் செயல்களைச் செய்பவர்கள் பாவலோகம் செல்கிறார்கள்.

அப்போது பேய் என்பது என்ன?

 மனிதன் தனக்கு இயற்கையான மரணம் நிகழும் முன், விபத்து அல்லது தற்கொலையின் மூலமாக  துர்மரணத்தைத் தேடிக் கொள்ளும் போது பேயாக மாறுகிறான். குறிப்பிட்ட சில காலங்கள் வரை அந்த இடத்தையே சுற்றி வருகிறான்.

ஆவிகளை  மனிதர்கள் 'மீடியம்' களின் மூலம் தொடர்பு கொள்கிறார்கள்.

இவற்றைப் பற்றி நிறைய ஆராய்ச்சிகள் நடந்த வண்ணம் இருக்கின்றன.

இதற்கு செத்துப் பிழைத்தவர்களையெல்லாம் பேட்டி கண்டு அவர்களின் அனுபவத்தை சேகரிக்கின்றனர் ஆராய்ச்சியாளார்கள். அவர்கள்( செ. பிழைத்தவர்கள்)  சொல்வது பெரும்பாலும் ஒன்றையொன்று ஒத்தே இருக்கின்றன.

பொதுவாய் அனைவரும் உடலிலிருந்து விடுபட்டதும், இருண்ட ஒரு சுரங்கப் பாதையில் வேகமாக செல்கின்றனர்.  தூரத்தில் ஒரு பேரொளியைக் காண்கின்றனர். அந்த ஒளியையே கடவுள் என்று கூறுகின்றனர். அதனிடம் அன்பும் கருணையும் நிறைந்திருப்பதாகவும், அங்கேயே தங்கிவிட வேண்டும் என்ற ஆசை ஏற்படுவதாகவும்  சொல்கின்றனர்.

அங்கே இவர்களின் வாழ்க்கை ஒரு திரைப்படம் போல இவர்களின் கண்முன்னே தோன்றுகிறதாம். இவர்கள்  துன்புறுத்திய போது மற்றவர்களுக்கு ஏற்பட்ட துன்பத்தை,  இவர்களால் உணரமுடிகிறதாம்.

பிறகு அந்த கடவுள், தன் ஆயுட்காலம் முடிவு பெறாததால் பூமிக்கு திரும்பும் படி கட்டளையிட்டதாகவும், அதன் பின்னே மனமின்றி திரும்பி தன் உடலுக்கு வந்ததாகவும் கூறுகின்றனர். 

இந்த அனுபவத்திற்கு பிறகு வாழ்கையைப் பற்றிய மனோபாவமே மாறி விட்டதாகவும், இறப்பை பற்றிய பயம் அவர்களுக்கு நீங்கிவிட்டதாகவும் தெரிகிறது.

தொடரும் .  .  .